news-img

Бұл Нұрсұлтан Назарбаев Қорының директоры Дариға Назарбаеваның Алматы облысындағы «Қамқорлық» оңалту орталығына жасаған сапары кезінде белгілі болды.

Ерекше қажеттіліктері бар балаларға арналған орталық Елбасы Нұрсұлтан Назарбаевтың «Қамқорлық» бастамасы аясында құрылды. Мекеме былтыр Тәуелсіздік күні қарсаңында ашылған. Нұрсұлтан Назарбаев Қорының директоры, Қазақстан Республикасы Парламенті Мәжілісінің депутаты Дариға Назарбаева және Алматы облысының әкімі Амандық Баталов орталық жұмысының алғашқы нәтижесімен танысты. Олар оңалту кабинеттерін көзбен көріп, қызметкерлермен жүздесті.

Алматы облысы Жамбыл аудандық орталық ауруханасындағы (Ұзынағаш ауылы, Қарасай батыр көшесі, 259) ғимараттың екі қабатында орналасқан орталықтың аумағы 800 шаршы метр. Мұнда церебралды паралич, аутизм, эпилепсия, ақыл-ойы кем, сөйлеу тілі дамымаған, бронхөкпе мен жүрек-қан тамырлары жүйесі аурулары бар балалар ем қабылдайды. Инновациялық технологияларға негізделген сапалы әрі тиімді кешенді оңалтудан өтуге жағдай жасалған. Балалар мен ата-аналар медициналық емдеу шаралары, түзету сабақтары, ойын-сауық сауықтыруға арналған бөлмелермен қамтылған.

Қазіргі таңда Жамбыл мен жақын маңдағы аудандармен қатар, Алматы қаласынан және өзге де облыстан келген 50 бала ата-анасымен бірге оңалтудан өтіп жатыр.

Церебралды сал ауруына шалдыққан бір жарым жастағы Батырханның анасы мекеме жұмысына дән риза. Маңғыстау облысының тұрғыны бір кездері Ұзынағашта тұрған және «Қамқорлық» орталығының ашылуын білген әжесінің айтуымен арнайы келген екен.

Келіншек Нұрсұлтан Назарбаев Қорының директоры ерекше қажеттілігі бар балалар мен ата-аналарына көрсеткен көмегіне шын жүректен алғыс айтып, ұлының оңалтудан кейінгі жағдайын баяндады. Қазір баласы селқос жатуды қойған, төсектен өздігінен түсіп, аяғын жерге тірей алады, еңбектеуге тырысады.

- Мұнда үш апталық курстан өтіп жатырмыз, бізге бәрі өте ұнады. Барлық жерде ем-дом қабылдау ақылы, әрі біз үшін өте қымбат, ал тегініне ұзын-сонар кезектің кесірінен кіре алмаймыз. Ал бұл жаңа орталықта барлығы жоғары деңгейде, әрі тегін. Ең әуелі орталықтың мамандарына алғыс айтамын. Талай жерде болдық, салыстырып айтарымыз бар. Бұл ең үздік орталық, - деп Аяланың анасы Жібек Қани әсерімен бөлісті.

Жеті жастағы Нұрсұлтан Шерәлінің әжесі Фатима апай да кешен мамандарының жоғары кәсібилігіне тәнті. «Немерем 15 күн бойы оңалту курсынан өтіп жатыр. Аяғын баса алмайтын, қазір ем-шараның арқасында қаз-қаз басып келеді. Ревматолог, массаж, терапия сынды өте жақсы кешенді ем алуда», - дейді ол.

Айта кетейік, орталық жыл сайын ерекше қажеттілігі бар 600 баланы ақысыз қабылдауға әзір.

- Бұл 2020 жылы Елбасының бастамасымен «Қамқорлық» жобасы аясында ашылған 8 оңалту орталығының бірі. Биыл Нұрсұлтан Назарбаев Қоры осы бағдарламаның бірінші кезеңін іске асыру барысында жинақталған тәжірибені қолдана отырып, оңалту моделін басқа аймақтарға пайдалануда. Шағын қалалар мен аудан орталықтарында қосымша 10 орталық ашу жоспарда, оңалту қызметінің сапасын арттырып, орталық жұмысының тұрақтылығын қамтамасыз ететін әрі ауыл балаларына қолжетімділікті қамтамасыз ететін мамандар даярлауға баса мән беріп отырмыз – дейді «Қамқорлық Қоры» Корпоративтік қорының директоры Арайлым Еркінова.

Естеріңізге салайық, Ұзынағаш кентіндегі орталықта 126 бала оңалту курсынан өткен. Жалпы, Қазақстан Республикасының Тұңғыш Президенті Н.Назарбаевтың бастамасын жүзеге асыру барысында 2020 жылдың желтоқсанынан 2021 жылдың наурызына дейінгі аралықта сегіз «Қамқорлық» орталығында 1186 бала ем-шара алды.

Алматы облысына жұмыс сапары аясында Дариға Назарбаева Ұзынағаш ауылындағы перзентханаға да ат басын бұрды. Онда Нұрсұлтан Назарбаев Қорының директорына (электрокардиография, ультрадыбыстық диагностикалық жүйе, сандық рентген аппараты және флюорография, 12 арналы ЭКГ аппараты) сынды қажетті медициналық құрылғылар орнатылған автобустар, яғни 17 жылжымалы медициналық кешен таныстырылды.

Әрбір медициналық автобуста жалпы қабылдау бөлмесі, акушер-гинеколог, сәулелік диагностика, жалпы тәжірибе дәрігерінің бөлімшесі, дәріхана, анализ қабылдау аймағы және портативті ультрадыбыстық эксперт сыныбы бар. Әрі халықты вакцинациялауға арналған бекеттер де бар.

Д.Назарбаеваның жұмыс сапары Шамалған ауылындағы спорт-сауықтыру кешені мен ҚР Тұңғыш Президенті - Елбасының «Атамекен» тарихи-мәдени орталығын аралаумен аяқталды.

Анықтама үшін

Еліміздің 8 өңірінде, атап айтқанда Алматы, Атырау, Батыс Қазақстан, Шығыс Қазақстан, Түркістан, Жамбыл, Қостанай облыстары мен Нұр-Сұлтан қаласында оңалту орталықтары ашылды.

Сол уақыттан бері 98 бала басын ұстауды, 145 қолмен сүйенуді, 178-і ұстауды, 93-і отыруды, 112-сі қолын жерге тіреп жүруді, 111-і еңбектеуді, 139-ы тіреумен тұруды,  60-ы өздігімен тұруды, 91-і тіреумен жүруді және 30-ы жүруді үйренді.

Биыл Ақтөбе, Ақмола, Алматы, Түркістан, Жамбыл, Маңғыстау, Қызылорда және Шығыс Қазақстан облыстарында тағы 8 оңалту орталығы мен 2 ерте араласу орталығын ашу жоспарлануда.

Жалпы, бұл бастаманың екінші кезеңін іске асыру жылына 11000 баланы оңалтуға мүмкіндік береді.

 

Нұрсұлтан Назарбаев Қорының Алматыдағы өкілдігі

PR-менеджер Артур Жұмашев

e-mail: pr.zhumashev@gmail.com

+7 727 305 36 19

+7 708 960 56 13

Түсініктеме қалдыру