Тұңғыш Президент Музейі суретші-реставраторының авторлық альбомы Франкфурттағы халықаралық кітап жәрмеңкесінде таныстырылды.

2025 жылдың қазан айында әлемдік кітап баспа индустриясындағы ең беделді және ауқымды алаңдардың бірі – Франкфурт кітап жәрмеңкесі аясында заманауи қазақ әдебиетінің және баспа ісінің даму бағыттарын бейнелейтін шамамен 350 кітапты қамтыған Қазақстанның ұлттық стенді ұсынылды. Солардың қатарында Қазақстан Республикасының Мәдениет қайраткері, Қазақстан Суретшілер одағының мүшесі, суретші-реставратор, кескіндемеші және график Женис Какенұлы Нұрлыбаевтың авторлық альбомы таныстырылды. Әлемдік ірі баспа форумына қатысу халықаралық аренада заманауи қазақстандық өнерді ілгерілетудегі маңызды кезең болды.

Альбом жұмысы 2024 жылы аяқталды. Басылымға автордың «Қала көріністері», «Сәйгүлік семантикасы», «Портреттер», «Шимай», «Күміс қауырсын», «Таңбалы тас» және басқа да тақырыптық сериялар бойынша құрылымдалған 150-ден астам кескіндеме және графикалық туындылары кірді. Сериялардың әрқайсысы суретшінің шығармашылығына тән негізгі көркемдік мотивтерді, философиялық мағыналарды және визуалды тілді бейнелейді.

Жоба Қазақстан Республикасы Мәдениет және ақпарат министрлігінің әлеуметтік маңызы бар әдебиет түрлерін сатып алу, басып шығару және тарату бағдарламасы аясында дайындалды. Сараптамалық қараудың нәтижесінде альбом Архив, құжаттама және кітап ісі комитетінен оң қорытынды алды, содан кейін 2025 жылдың басында «Ардар-Жи» баспаханасында 1000 дана тиражбен жарық көрді.

Дайын басылым елдің жетекші кітапханаларының қорларына берілді және халықаралық кәсіби алаңдар арқылы таратуға ұсынылды. Кең аудитория үшін кітап ағылшын тіліне де аударылды.

Альбомның жарық көруі тек ауқымды шығармашылық еңбектің қорытындысы ғана емес, сонымен қатар мәдени бейнелерді, тарихи жадыны және заманауи көркемдік тілді тоғыстыратын ұлттық көркем мұраны сақтау мен оны кеңінен насихаттауға қосылған маңызды үлес болып табылады.